*ವಿಕಸಿತ ಭಾರತ ಎಂದರೆ*..…?

 *ವಿಕಸಿತ ಭಾರತ ಎಂದರೆ*..…?

ಅಕ್ಕಿಯ ಬೆಲೆ ಗಗನಕ್ಕೆ ಹಾರಿ, ಬಾಣಲೆಯು ಬಿಸಿಯಲಿ ಖಾಲಿ,

ಬಡವನ ಬೆವರ ಬೆಲೆ ಮಾತ್ರ, ಬೀದಿಯ ಧೂಳಿಗೆ ತಳ್ಳಿ,

ಹೊಟ್ಟೆಯ ಹಸಿವಿಗೆ ಮಾತಿನ ಮದ್ದು, ಭರವಸೆಯ ಹೊದಿಕೆ ಹಚ್ಚಿ,

ಇದೇನಾ ವಿಕಸಿತ ಭಾರತ — ಹಸಿವಿನ ಕಣ್ಣೀರಿಗೆ ಬೆಳ್ಳಿ?      #1#

ತರಕಾರಿಯ ಬೆಲೆ ತಾರೆಯಂತೆ, ತಲುಪದ ಎತ್ತರ ಸೇರಿ,

ಸಂತೆ ದಾರಿಯಲಿ ತಾಯಿಯ ಕೈ, ಚೀಲವಿಲ್ಲದೆ ಮನೆ ಸೇರಿ,

ಮಕ್ಕಳ ಕನಸು ಪುಸ್ತಕದಲ್ಲೇ, ಬದುಕು ಸಾಲದಲಿ ತೇಲಿ,

ಇದೇನಾ ವಿಕಸಿತ ಭಾರತ — ಖಾಲಿ ತಟ್ಟೆಯ ಹಾಡು ಕೇಳಿ?        

                                          #2#

ಪೆಟ್ರೋಲ್ ಹನಿ ಚಿನ್ನದ ಬೆಲೆ, ಚಕ್ರದ ಓಟವೂ ನಿಧಾನ,

ಉದ್ಯೋಗದ ಬಾಗಿಲು ಮುಚ್ಚಿ, ಯುವಜನ ಮನದಲಿ ಶೋಕಗಾನ,

ಭಾಷಣಗಳಲಿ ಬೆಳಕಿನ ಹಬ್ಬ, ಬದುಕಿನ ದಾರಿಯಲಿ ಮಂಜುಮೇಘ,

ಇದೇನಾ ವಿಕಸಿತ ಭಾರತ — ಜನತೆಯ ನೋವಿಗೆ ಯಾರು ಸಾಕ್ಷಿ?

                                          #3#

ಗ್ಯಾಸ್ ಬೆಲೆ ಬೆಂಕಿಯಂತೆ, ಅಡುಗೆ ಮನೆಯಲಿ ಮೌನ,

ಔಷಧಿಯ ದರ ಏರಿದಂತೆ, ರೋಗಿಯ ಉಸಿರಿಗೂ ಸಾಲದ ಋಣ,

ಸೌಲಭ್ಯಗಳ ಕನಸು ಬಣ್ಣದಲಿ, ಬದುಕು ಬತ್ತಿದ ಹೊಲದ ರೂಪ,

ಇದೇನಾ ವಿಕಸಿತ ಭಾರತ — ಜನರ ಬದುಕೇ ಪ್ರಶ್ನಾರೂಪ?          # 4#

ಮಹಲಿನೊಳಗೊಂದು ಸಂಭ್ರಮ ಜ್ಯೋತಿ, ಗುಡಿಸಲೊಳಗೊಂದು ಕತ್ತಲು,

ಘೋಷಣೆಗಳ ಗಾಳಿ ದೊಡ್ಡದು, ಹೊಟ್ಟೆ ಮಾತಿಗೆ ಯಾರು ಬೆಂಬಲ?

ಅಭಿವೃದ್ಧಿಯ ಹೆಸರಲಿ ಜನ, ಅಶ್ರುವಿನ ಹಾದಿಯಲಿ ನಿಂತಾಗ,

“ವಿಕಸಿತ ಭಾರತ” ಎಂದರೆ — ಜನ ನಗುವ ದೇಶವಲ್ಲವೇ ಆಗ?    #5#

ಕವಿ:ಡಾ. ಜಯವೀರ ಎ. ಕೆ.

    ಖೇಮಲಾಪುರ