# ಹಾಡಬೇಕು ನಾನು..#

 ## ಹಾಡಬೇಕು ನಾನು..##

ಹರಿದ ಚಿಂದಿ ಬಟ್ಟೆಯಲಿ ನಿನ್ನನು

ನೋಡಿ, ಮುಸಿ ಮುಸಿ ನಕ್ಕಾಗ;

ತಿಪ್ಪೆಯ ಗುಂಡಿಗೆ ಎಸೆದ ಪತ್ರೋಳಿಯಲಿ

ಅನ್ನ ಹುಡುಕಿ ನೀನು ತಿನ್ನುವಾಗ.

ಬಲ್ಲಿದರ ಮಕ್ಕಳು ಶಾಲೆಗೆ ಹೋಗದೆ

ಒಲ್ಲೆಂದು ಚೀರಾಡಿ ಹಠ ಮಾಡುವಾಗ;

ಕೆದರಿದ ಕೂದಲು,ಮೆತ್ತಿದ ರಾಡಿಯಲಿ,

ಬೆರಗುಗಣ್ಣಿಂದ ನೋಡಿ ಅವುಡುಗಚ್ಚಿ ನೀನು ನಿಂತಾಗ!

ತುತ್ತು ಅನ್ನಕಾಗಿ ಅಪ್ಪ-ಅವ್ವನೊಂದಿಗೆ

ಹೆಗಲು ಕೊಟ್ಟ ನಿನ್ನ ಶ್ರಮಕ್ಕಾಗಿ;

ಸಿಕ್ಕಷ್ಟು ತಿಂದು ಕಾರುಗೀರುಗಳ ಮಧ್ಯ

ಮಲಗಿ ವಿಶ್ರಮಿಸುವ ನಿನ್ನ ಸುಖಕ್ಕಾಗಿ.

ಬಂಧಿಯೂ ನೀನಲ್ಲ,ಬಂಧನವೂ ನಿನಗಿಲ್ಲ  ಸಿಕ್ಕಷ್ಟು ನಿನಗೆ ದಕ್ಕಿದಷ್ಟು ತಿಂದು

ನೋವ ನುಂಗಿ ನಲಿವ ನಿನ್ನ ಸ್ವರ್ಗ

ಸುಖವ ಕಂಡು ಬೆರಗಿನಿಂದ..!

ರಾಚು ಎಸ್. ಕೊಪ್ಪಾ ಬಂಥನಾಳ