*ಅಮ್ಮನಿಗೆ ನಮನ*

 *ಅಮ್ಮನಿಗೆ ನಮನ*

ಅಮ್ಮನಿಗರ್ಪಣೆ ಮಾಡುವೆನೀದಿನ

ಕವನದ ಪರಿಯಲಿ ನನ್ನನ್ನು|

ದೇವರಿಗಿಂತಲು ಹೆಚ್ಚಿನ ಗೌರವ

ಭಾವನೆ ಮೆರೆಯುವ ಮನವನ್ನು||೧||

ತಾಯಿಯು ಕರುಳಿನ ಕುಡಿಯನು ಎತ್ತಲು

ಮಗುವಿಗೆ ಕಿರುನಗೆ ಮೂಡುವುದು|

ಅಮ್ಮನ ಅಪ್ಪುಗೆಯಲಿ ಮಗು ಸಂತಸ

ಪಡುತಿಹ ದೃಶ್ಯವು ಕಾಣುವುದು||೨||

ಮಗುವನು ಅಪ್ಪಿದ ತಾಯಿಯ ಮೊಗದಲಿ

ತೃಪ್ತಿಯ ಭಾವವು ತೇಲುತಿದೆ|

ಯಾವುದೆ ನಿಧಿಗೂ ಮೀರಿದ ಮೌಲ್ಯವು

ಪಡೆಯುವ ನೆಮ್ಮದಿ ತೋರುತಿದೆ||೩||

ನಗುತಿಹ ಮಗುವಿನ ತುಟಿಯದು ಬಿರಿಯುವ

ಮಲ್ಲಿಗೆ ಮೊಗ್ಗಿನ ಸೊಬಗಂತೆ|

ಅಳುತಿಹ ಕಂದನ ಕಣ್ಗಳ ಹನಿಗಳು

ಮುತ್ತಿನ ಮಣಿಗಳು ಹರಿದಂತೆ||೪||

ನನ್ನೀ ಪುಟ್ಟನು ಜಗದಲಿ ಜಾಣನು

ಅವನಿಗೆ ಸಾಟಿಯು ಇನ್ನಿಲ್ಲ|

ಎನ್ನುವ ಅಮ್ಮನ ಮಾತನು ಕೇಳಲು

ಕಂದನ ನಗುವಿಗೆ ಕೊನೆಯಿಲ್ಲ||೫||

ಬಾನಲಿ ತೇಲುವ ಚಂದ್ರನ ತೋರಿಸಿ

ಅಮ್ಮನು ತುತ್ತನು ಕೊಡುವಾಗ|

ಅಮೃತಧಾರೆಯೆ ತುತ್ತಲಿ ಬೆರೆಯಲು

ಪುಟ್ಟನು ಉಣುವನು ಬಲುಬೇಗ||೬||

ಅಮ್ಮನು ತೊಟ್ಟಿಲು ತೂಗುತ ಜೋಗುಳ

ಹಾಡಲು ನಿದ್ರೆಯು ಬರದಿಹುದೇ! |

ಮುಚ್ಚಿದ ಕಣ್ಗಳ ಕನಸಲಿ ಚಂದ್ರನು

ಆಡಲು ಜೊತೆಯಲಿ ನಿಲಬಹುದೇ? ||೭||

ನೆನಪಿಡಿ ಎಂದಿಗು ಶೋಷಕ ರೂಪದ

ಜನನಿಯು ಜಗದಲಿ ಜನಿಸಿಲ್ಲ|

ಎನ್ನುವ ಸಂಸ್ಕ್ರತ ಶ್ಲೋಕದ ಅರ್ಥವು

ಯಾವುದೆ ಕಾಲಕು ಸಟೆಯಲ್ಲ||೮||

*ಕಿಗ್ಗಾಲು ಎಸ್ ಗಿರೀಶ್,ಮೂರ್ನಾಡು*

೧೦-೦೫-೨೦೨೬