HONEY ಹನಿಗಳು..

 "ಇಲ್ಲಿವೆ ಪ್ರೇಮದ ಮಾಟ. ಪರಿಪಾಠ, ಪರದಾಟಗಳ ಬಿಚ್ಚಿಡುವ ಹತ್ತು ಹನಿಗಳು. ಪ್ರೀತಿಯ ನೋಟ, ಕಾಟ, ಕಣ್ಣಮುಚ್ಚಾಲೆಯಾಟ ಸಾರುವ ಘಮ್ಮತ್ತು ದನಿಗಳು. ಕಚಗುಳಿಯಿಡುತ ಪುಳಕಿಸುವ ಒಲವು, ನಲಿವು, ನಿಲುವಿನ ಮಸ್ತು ಮಸ್ತು ಖನಿಗಳು. ತುಸು ತರಲೆ, ಲಘು ಲಾಸ್ಯ, ಕೊಂಚ ಕೀಟಲೆಯ ಈ ಹನಿಗಳು ನಿಮಗೆ ಖಂಡಿತಾ ಇಷ್ಟವಾಗುತ್ತದೆ. ಕಾರಣ ನಿಮ್ಮೊಡಲ ಒಳಗಿನ ಒಲವ ಅಂತರ್ಗಾಮಿನಿ, ಅನುರಾಗಸ್ವರಗಳ ಭಾವಭಾಮಿನಿ. ಏನಂತೀರಾ..?" - ಪ್ರೀತಿಯಿಂದ ಎ.ಎನ್.ರಮೇಶ್.ಗುಬ್ಬಿ. 

HONEY ಹನಿಗಳು..

1. ಪ್ರೇಮೋಗ್ರಾಫ್..!

ಹಾಕುವಷ್ಟರಲ್ಲಿ ಲೇಖನಿಯಿಂದ 

ಅಭಿಮಾನದ ಆಟೋಗ್ರಾಫ್...

ಬರೆದಿದ್ದಳು ಕಣ್ಣಂಚಿನಿಂದ

ಅನುರಾಗದ ಪ್ಯಾರಾಗ್ರಾಫ್.! 

*********************

2. ಮಳ್ಳಿ..!

ಅದೆಂತಹ ಜಾಣ ಮರೆವು 

ನೆನೆದು ಪಡೆವುದಷ್ಟೇ ಗೊತ್ತು

ಮರಳಿಸುವುದಿಲ್ಲ ದಿನವು

ನನ್ನಿಂದ ಪಡೆದ ಮುತ್ತು.!

***************

3. ಪರಾರಿ.!

‘ಓಡಿ ಹೋಗೋಣ ಬಾ’ ಎಂದೆ

ಹೂ ಎಂದು ಓಡಿಯೇ ಬಿಟ್ಟಳು 

ನನ್ನ ಕೈಗೂ ಸಿಗದಂತೆ ಮುಂದೆ.!

******************

4. ಬದಲು.!

ಮದುವೆಗೆ ಮುನ್ನ ಹೇಳುತ್ತಿದ್ದೆ..

“ನೀ ನಕ್ಕರೆ ಮುತ್ತುದುರಿದಂತೆ”

ಇಂದು ಅವಳೇ ಹೇಳುತ್ತಾಳೆ

ಮುತ್ತುದುರಿಸಿದರಷ್ಟೆ ನಗುತ್ತೇನೆಂದು.!

*******************

5.ವಾಚ್ಯ-ಸೂಚ್ಯ.!

"ಐ ಲವ್ ಯೂ" ಎಂದರೆ....

ನಾನಿನ್ನ ಪ್ರೀತಿಸುವೆನೆಂಬ ವಾಚ್ಯ

ನಿನ್ನಿಂದಲು ನಾನು ಪ್ರೀತಿಸಲ್ಪಡಲು

ಬಯಸುತ್ತೇನೆ ಎಂಬುದು ಸೂಚ್ಯ.!

********************

6. ನವೀಕರಣ.!

ಆಗಾಗ ಕಾಯುವಿಕೆ ಬೇವಿಗೆ

ಅಧರಾಮೃತದ ಬೆಲ್ಲವಿಡೆ..

ನಿತ್ಯ ಕಾಯುಬಲ್ಲುದು ಕಾಯ

ಸರಿದರೂ ಅದೆಷ್ಟೇ ಸಮಯ.!

******************

7. ಕಿಸ್-ಮತ್ತು.!

ಮಧುರ ಮಾತಿಗಿದೆ 

ಮತ್ತೇರಿಸುವ ಘಮ್ಮತ್ತು

ಅಧರ ಮುತ್ತಿಗಿದೆ 

ಮೈಮರೆಸುವ ತಾಕತ್ತು.!

******************

8. ಬೆಸುಗೆ.!

ಜೀವ ಭಾವ ಬೆಸೆವ

ಉಸಿರಿಗೆಲ್ಲಿದೆ ಹೆಸರು

ಬೆರೆತಷ್ಟು ಉಸಿರುಸಿರು

ಎದೆಗಳು ಹಚ್ಚಹಸಿರು.!

*********************

9. ಕಂಜೂಸ್.!

ಕೊಟ್ಟರು ಸಾವಿರ ಮುತ್ತುಗಳು

ನಾನು ಮುಕ್ತವಾಗಿ ಮನಬಿಚ್ಚಿ

ಮರಳಿ ನೀಡುವುದಿಲ್ಲ ಅವಳು

ಒಂದೇ ಒಂದನ್ನೂ ತುಟಿಬಿಚ್ಚಿ.!

*****************

10. ಸಂವೇದನೆ.!

ಗೆಳತಿ ಇರಬಹುದು ನಮ್ಮಿಬ್ಬರಲಿ

ಗಂಡು ಹೆಣ್ಣೆಂಬ ಲಿಂಗಭೇದ..

ಆದರೆ ನಿತ್ಯ ಜೀವಸಂವೇದನೆಗಳಲಿ

ಅನುಕ್ಷಣ ಯೋಚನೆ ಯಾತನೆಗಳಲಿ

ಇಲ್ಲವೇ ಇಲ್ಲ ಎಳ್ಳಷ್ಟು ಭಾವಭೇದ.!

ಎ.ಎನ್.ರಮೇಶ್.ಗುಬ್ಬಿ.