ವ್ಯಕ್ತಿ-ವ್ಯಕ್ತಿತ್ವಗಳ ಅನಾವರಣದ ಅಷ್ಟ ಹನಿಗಳು

 "ಇಲ್ಲಿವೆ ವ್ಯಕ್ತಿ-ವ್ಯಕ್ತಿತ್ವಗಳ ಅನಾವರಣದ ಅಷ್ಟ ಹನಿಗಳು. ಭಾವ ಮಾಧುರ್ಯ

ಮಾರ್ದನಿಸುವ ಸ್ಪಷ್ಟ ರಿಂಗಣಗಳ ದನಿಗಳು. ಜೀವ ಸೌಂದರ್ಯದ ನಿಜ ಖನಿಗಳು. ಇಲ್ಲಿ ಆಳಕ್ಕಿಳಿದಷ್ಟೂ ಜೀವ-ಭಾವಗಳ ಸತ್ವವಿದೆ. ಅರಿತಷ್ಟೂ ಬದುಕು-ಬೆಳಕಿನ ತತ್ವವಿದೆ. ಅರ್ಥೈಸಿದಷ್ಟೂ ವ್ಯಕ್ತಿತ್ವ ಮೌಲ್ಯಗಳ ಮಹತ್ವವಿದೆ. ಏನಂತೀರಾ..?" - ಪ್ರೀತಿಯಿಂದ ಎ.ಎನ್.ರಮೇಶ್.ಗುಬ್ಬಿ.

1. ವ್ಯಕ್ತಿತ್ವ.!

ವ್ಯಕ್ತಿತ್ವವೆಂದರೆ ನಮಗೆ ನಾವೇ

ಕೊಟ್ಟುಕೊಳ್ಳುವ ಪ್ರಶಂಸಾಪತ್ರವಲ್ಲ

ಅದು ಜಗತ್ತು ನೀಡುವ ಪ್ರಮಾಣಪತ್ರ.!

*********************

2. ಚೆಲುವು.!

ವ್ಯಕ್ತಿತ್ವದ ಸೌಂದರ್ಯ ಮೊಗದಲ್ಲಿಲ್ಲ

ಗುಣ ಅಂತಃಕರಣ ಔದಾರ್ಯದಲ್ಲಿದೆ

ವ್ಯಕ್ತಿತ್ವದ ಮಾಧುರ್ಯ ಮಾತಿನಲ್ಲಿಲ್ಲ

ಮೌನ ಘನತೆ ಗಾಂಭೀರ್ಯದಲ್ಲಿದೆ.!

***********************

3. ಮಹತ್ವ.!

ನುಡಿಯಲಲ್ಲ

ನಡೆಯಲಿರಬೇಕು ಸತ್ವ

ಆಡುವುದರಲಲ್ಲ

ಆಚರಣೆಯಲಿರಬೇಕು ತತ್ವ.!

******************

4. ಕೆತ್ತನೆ-ಕಡೆಗಣನೆ.!

ತನ್ನನ್ನು ತಾನು ಕಡೆದುಕೊಂಡವ

ಪಕ್ವ ಪರಿಪೂರ್ಣ ಶಿಲ್ಪವಾಗುತ್ತಾನೆ

ಕಡೆದುಕೊಳ್ಳದೆ ಕಡೆಗಣಿಸಿಕೊಂಡರೆ

ಚರ್ವಿತಚವರ್ಣ ವಿಕಲ್ಪವಾಗುತ್ತೇನೆ.!

*********************

5. ಅಸ್ಮಿತೆ.!

ಶಕ್ತಿಯಿಂದ ಕೊಂಡುಕೊಳ್ಳಲಾಗದು

ಯುಕ್ತಿಯಿಂದ ಕಸಿದುಕೊಳ್ಳಲಾಗದು

ಭಕ್ತಿಯಿಂದ ಪಡೆದುಕೊಳ್ಳಲಾಗದು

ಅರಿವಿನಿಂದ ರೂಪಿಸಿಕೊಳ್ಳಬಹುದು

ಆಸಕ್ತಿಯಿಂದ ರೂಢಿಸಿಕೊಳ್ಳಬಹುದು.!

**********************

6. ಸ್ವಯಂಭು.!

ಜನನದಿಂದ ತಾನೇ 

ವ್ಯಕ್ತಿಗತವಾಗಿ ಬರುವುದು ಸ್ವಭಾವ.!

ಜತನದಿಂದ ನಾವೇ 

ಆತ್ಮಗತವಾಗಿ ಕಟ್ಟಿಕೊಳ್ಳುವುದು ವ್ಯಕ್ತಿತ್ವ.!

***********************

7. ರೂಪಾಂತರ.!

ಹೊಳೆವ ಸೆಳೆವ ವಿಗ್ರಹವಾಗಲು

ಬೇಕು ಉಳಿಪೆಟ್ಟು ತಿನ್ನುವ ಒಲವು

ತುಟಿಕಚ್ಚಿ ಸಹಿಸಿ ನಿಲ್ಲುವ ಛಲವು

ಒಳಗೆ ಛಿದ್ರವಾಗದ ಕಸುವು ಬಲವು.!

*******************

8. ಸೂಕ್ತ.!

ಲೋಕಕ್ಕೆಲ್ಲ ಸ್ತೂಪವಾಗುವ ಮೊದಲು

ಮನೆ ಬೆಳಗುವ ದೀಪವಾಬೇಕು.!

ತತ್ವಗಳ ಪ್ರದರ್ಶನವಾಗುವ ಬದಲು

ವ್ಯಕ್ತಿತ್ವದ ನಿದರ್ಶನವಾಗಬೇಕು.!

ಎ.ಎನ್.ರಮೇಶ್.ಗುಬ್ಬಿ.