ಮುಷ್ಠಿ..!

 “ಇದು ಚಿತ್ರಕ್ಕಾಗಿ ಬರೆದ ಕವಿತೆಯಲ್ಲ. ಚಿತ್ರವೇ ಬರೆಸಿದ ಭಾವಗೀತೆ. ಅಂತರ್ಜಾಲದಲ್ಲಿ ಕಂಡ ಈ ಚಿತ್ರ ನನ್ನೆದೆಯಲ್ಲಿ ಮೂಡಿಸಿದ ಭಾವಸಂವೇದನೆಗಳ ಅಕ್ಷರರೂಪವೇ ಈ ಕವಿತೆ. ಈ ಡಿಜಿಟಲ್ ಯುಗದಲ್ಲಿ ಕ್ರಿಯಾತ್ಮಕ ಮನಸುಗಳು ಏನೇನೆಲ್ಲ ಅದ್ಭುತಗಳನ್ನು ಕಲ್ಪಿಸಿಕೊಳ್ಳುತ್ತವೆ. ಆ ಕಲ್ಪನೆಗಳನ್ನು ಅದೆಷ್ಟು ಅನನ್ಯವಾಗಿ ಅಭಿವ್ಯಕ್ತಿಸುತ್ತವೆ. ಅದೆಷ್ಟು ಅಪೂರ್ವವಾಗಿ ವಿನ್ಯಾಸಗೊಳಿಸುತ್ತವೆ. ನಿಜಕ್ಕೂ ಇಂತಹ ಡಿಜಿಟಲ್ ಚಿತ್ರಕಾರರಿಗೊಂದು ಅಚ್ಚರಿತುಂಬಿದ ಸಲಾಮ್. ಏನಂತೀರಾ..?” - ಪ್ರೀತಿಯಿಂದ ಎ.ಎನ್.ರಮೇಶ್.ಗುಬ್ಬಿ. 

ಮುಷ್ಠಿ..!

ಕಟ್ಟಿದ ಮುಷ್ಠಿಯಂತೆ

ಹಿಡಿಗಾತ್ರದ ಹೃದಯ

ಆಗದಿರಲೆಂದು ಕಠಿಣ.!

ಸ್ಫುರಿವ ಸಮಷ್ಟಿಯಂತೆ

ಹೃದಯ ವೈಶಾಲ್ಯದಿ

ಹರಿಸುತಿರಲಿ ಕರುಣ.!

ಹೃದಯ ಮುಷ್ಠಿಕಟ್ಟುತ

ಮೆರೆದವರೆಲ್ಲಾ ನಿತ್ಯವು

ನರಳಿದರು ಬದುಕಲ್ಲಿ.!

ಎದೆಯ ಅಬ್ಧಿಯಾಗಿಸಿ

ಮೊರೆದವರೆಲ್ಲ ಸದಾ

ನಳನಳಿಸಿದರು ಬೆಳಕಲ್ಲಿ.!

ಎ.ಎನ್.ರಮೇಶ್.ಗುಬ್ಬಿ.