ಸಿದ್ದೇಶ್ವರ ಮಹಾತ್ಮಾರಿಗೆ: ನುಡಿ ನಮನ

ನುಡಿಯಲ್ಲೇ ನಡೆದು 

ಕೃತಿಯಲ್ಲಿ ಪ್ರಕೃತಿಯಾಗಿ ಪಂಚಭೂತಗಳಲ್ಲಿ ಲೀನವಾಗಿ ನಿಸರ್ಗವಾಗಿ ಉಳಿದವರು  ಎಷ್ಟಿಹರು ಜಗದಲಿ?

 ಆಸೆಗಳನ್ನು ಮಿತಗೊಳಿಸಿ, ಹಿತ-ಮಿತ ನುಡಿಗಳು

ಸತ್ಯ ಸತ್ವ ಸುಂದರ ವಿಚಾರಗಳು 

ಕತ್ತಲೆ ಕರಗಿಸುವ ಬೆಳಕಾಗಿ ಕೋಟಿ ನಕ್ಷತ್ರ ತಾರೆಗಳೆ ನಾಚುವಂತೆ,

ಬಾಳಿ ಬೆಳಗಿದ ಯೋಗಿ 

ರೋಗ - ರುಜಿನ ಸಾವು - ನೋವು ಕಷ್ಟ- ನಷ್ಟ ಯಾರನ್ನು ಬಿಡಲಿಲ್ಲವಾದರೂ 

ಮನುಷ್ಯ ಜನ್ಮವೇ ಹೆಮ್ಮೆ ಪಡುವಷ್ಟು 

ಸರಳ ಸೌಜನ್ಯ, ಜ್ಞಾನ - ವಿಜ್ಞಾನದ ಪ್ರತೀಕ 

ಮಾಡಿದ ಬೋಧವೆಲ್ಲ ವೇದವಾಗಿದೆ 

ಜಗದ ಸರ್ವ ಶ್ರೇಷ್ಠ ತತ್ವಜ್ಞಾನಿಗಳ ಸೇರಿ

 ತಾನೊಂದು ಕ್ರಾಂತಿಯಾಗಿ ಬೆಳೆದು 

ಹಾಡುವ ಕೋಗಿಲೆಗಳ ಮಾಮರವಾಗಿ

ಕವಿಯಾಗಿ ಪ್ರವಚನಗಾರನಾಗಿ ಈ ಯುಗದ 

ಪ್ರವರ್ತಕನಾಗಿ ವಚನ ನಿರ್ವಹಿಸಿದ ಸರಳ ಸಾಧು 

ಸಾಮಾನ್ಯ ಕುಟುಂಬದಲ್ಲಿ ಸಾಮಾನ್ಯನಾಗಿ ಹುಟ್ಟಿ ಬಯಲು ಸೀಮೆಯಲಿ

ಆಧ್ಯಾತ್ಮ -ಜ್ಞಾನ ಜಲವಾಗಿ ಹರಿದು 

ಯೋಗಿಯಾಗಿ, ತ್ಯಾಗಿಯಾಗಿ, ಉತ್ತಮರಲ್ಲೇ ಸರ್ವೋತ್ತಮನಾಗಿ 

ದೃತಿಗಡದೆ, ಮತಿಗಡದೆ ಸನ್ಮಾರ್ಗದಲ್ಲಿ ತಾನೊಂದು ಕೃತಿಯಾಗಿ, 

ಕೋಟಿ ಮನಗಳಿಗೆ ಜ್ಞಾನ ಉನ ಬಡಿಸಿ 

ಹುಟ್ಟು ಸಾವಿನ ನಡುವೆ

ಸೃಷ್ಟಿಗೆ ಸಮನಾದ ಸಂತ-ಶರಣ ಸದ್ಗುಣಿ, ನಿಜಗುಣಿ, ಸುಯೋಗಿ 

ಅದೆಂತ ನಡೆ-ನುಡಿ 

ಆಚಾರ- ವಿಚಾರ

ಸಂಸ್ಕೃತಿ ಸಂಸ್ಕಾರ? 

ಎಂಥಾ ಮಾತುಗಾರಿಕೆ?

ಜ್ಞಾನ -ವಿಜ್ಞಾನ, ಪ್ರವಚನ, ವಿವೇಚನ 

ವಿಶಾಲತೆ, ವಿವೇಕ,ವಿದ್ಯೆ ಝರಿಯಾಗಿ,ಹರಿಯಾಗಿ ನದಿಯಾಗಿ

 ಸಾಗರ -ಸಮೃದ್ಧಿಯಾಗಿ ಮೃದುವಾಗಿ,ಸಂಜೀವಿನಿಯಾಗಿ, ವಾಹಿನಿಯಾಗಿ,ಭಾಷೆಯಾಗಿ, ಬದುಕಾಗಿ,ಬಲವಾಗಿ, ಛಲವಾಗಿ ಪ್ರಕೃತಿಯಲ್ಲಿ ಒಂದಾಗುವ ಬಯಕೆ 

ಎಂಥಾ ದೃಢ ನಿರ್ಧಾರ?

ಅಸ್ತಿ ಇಲ್ಲ, ಆಸ್ತಿ ಇಲ್ಲ 

ಗುಡಿ- ಗುಂಡಾರ ಅರಮನೆಯಿಲ್ಲ

ಆಡಂಬರವಿಲ್ಲ ಆದರೂ ಅಳಿದಿಲ್ಲ, ಮರೆಯಾಗಿಲ್ಲ                     ನದಿಯಲ್ಲಿ ನೀರಾಗಿ, ಪ್ರಕೃತಿಯಲ್ಲಿ ಹಸಿರಾಗಿ, ತನು-ಮನಗಳಲ್ಲಿ ಉಸಿರಾಗಿ ಬೆಳಕಾಗಿ ಮರುಜನ್ಮ ಪಡೆದವರು

ಸರ್ವಶ್ರೇಷ್ಠ ಸಿದ್ದೇಶ್ವರ ಮಹಾ ಸ್ವಾಮೀಜಿಗಳಿಗೆ 

ಭಕ್ತಿಗಾಗಿ ನುಡಿ ನಮನ 

ಡಾ.ಮಹಾದೇವ  ಪೋತರಾಜ್