ಮರೆವಿನ ಹನಿಗಳು..!

 "ಇಲ್ಲಿವೆ ಒಂದು ಡಜನ್ ಮರೆವಿನ ಹನಿಗಳು. ಮರೆಗುಳಿತನದ ಆಂತರ್ಯ ಬಿಚ್ಚಿಡುವ ಹನ್ನೆರಡು ದನಿಗಳು. ಮರೆವು, ಅರಿವು, ಪರಿವುಗಳ ಕರ್ಮ-ಧರ್ಮದ ಮಾರ್ಮಿಕ ಮಾರ್ದನಿಗಳು. "ಮರೆವು" ಎಂಬ ಮೂರಕ್ಷರದ ಪದದಲ್ಲಿ ಏನೇನೆಲ್ಲ ಸಂಗತಿಗಳ ಸೂಚ್ಯ ಭಾಷ್ಯಗಳ ಮೊರೆತವಿದೆ. ಎಷ್ಟೆಲ್ಲ ಭಾವ ಸಂವೇದನೆಗಳ ಭೋರ್ಗರೆತವಿದೆ. ಏನಂತೀರಾ..?"- ಪ್ರೀತಿಯಿಂದ ಎ.ಎನ್.ರಮೇಶ್.ಗುಬ್ಬಿ. 

ಮರೆವಿನ ಹನಿಗಳು..!

1. ಮರೆವು.!

ನೆನಪುಗಳು ಬೇಕೆನ್ನುವವರಿಗೆ

ಮರೆವೆಂಬುದು ರೋಗ.!

ನೆನಪುಗಳೆ ಬೇಡೆನ್ನುವವರಿಗೆ

ಮರೆವೆಂಬುದು ಯೋಗ.!

**********************

2. ನಂಟು.!

ಬುದ್ದಿವಂತರಿಗೆ ಮರೆವಿನ ಚಿಂತೆ

ಹೃದಯವಂತರಿಗೆ ನೆನಪುಗಳ ಸಂತೆ.!

*********************

3. ಜಾಣ ಮರೆವು.!

ಬಹಳಷ್ಟು ಜನರಿಗೆ ಕೊಟ್ಟಿದ್ದರ 

ಕುರಿತು ಪೂರ್ಣ ಅರಿವು ಪರಿವು

ಪಡೆದಿದ್ದರ ಬಗೆಗೆ ಅದೇಕೋ

ಅಕ್ಷರಶಃ ಸಂಪೂರ್ಣ ಮರೆವು.!

***********************

4. ವಿಪರ್ಯಾಸ.!

ನೆನೆಯಬೇಕೆನ್ನುವ ಸಾವಿರ ಸಿಹಿಗಳಿಗಿಂತಲೂ

ಮರೆಯಬೇಕೆನ್ನುವ ಒಂದೇ ಒಂದು ಕಹಿಯೆ

ಹೆಚ್ಚು ಕಾಡುವುದು, ಹುಚ್ಚು ಮಾಡುವುದು.!

********************

5. ಅಗತ್ಯ.!

ಜೀವಕ್ಕೆ ಮರೆವು ಬೇಕು

ಜೀವನಕ್ಕೆ ಅರಿವು ಬೇಕು.!

*******************

6. ಅವಿನಾ.!

ಮರೆವಿಗೆ ಶರಣಾದರೆ

ನಿರಾಳ ಬದುಕು

ಅರಿವಿಗೆ ಶರಣಾದರೆ

ಧಾರಾಳ ಬೆಳಕು.!

******************

7. ಪರಿಹಾಸ.!

ಮರೆಯುವವರಿಗೆ

ನೆನಪುಗಳೆ ಇಲ್ಲ.!

ಮರೆಯದವರಿಗೆ

ನೆನಪುಗಳೆ ಎಲ್ಲ.!

****************

8. ಅಂತರ.!

ಮರೆತು ಇರುವವರಿಗೆ

ಮರೆವು ವರರೂಪ.!

ಮರೆಯಲು ಆಗದವರಿಗೆ

ಮರೆವು ಘೋರಶಾಪ.!

*****************

9. ಕಿಲಾಡಿ.!

ಬೇಕಿದ್ದನ್ನು ಮರೆಯಲಾಗದಷ್ಟು ಅರಿವು

ಬೇಡದ್ದನ್ನು ನೆನಪಿಡಲಾಗದಷ್ಟು ಮರೆವು

*******************

10. ಯಾದಿ.!

ಮರೆವಿನ ಅವಧಿ

ಗೆದ್ದರಷ್ಟೆ ನಮಗೆ

ಅರಿವಿನ ಪರಿಧಿ.!

***************

11. ದುರಂತ.!

ಕೆಲವರಿಗೆ ಮರೆವಿನ ಜ್ವರ

ಹಲವರಿಗೆ ನೆನಪಿನ ಬರ.!

******************

12. ಸತ್ಯ.!

ಮೆದುಳಷ್ಟೇ ಇದ್ದವರು

ಮರೆತು ನಿರಾಳವಾಗುತ್ತಾರೆ

ಹೃದಯವೂ ಇದ್ದವರು

ಮರೆಯಲಾಗದೆ ನರಳುತ್ತಾರೆ.!

ಎ.ಎನ್.ರಮೇಶ್.ಗುಬ್ಬಿ.