ಬೆಳಕಿನ ಕಿರಣಗಳ ಚಿಮ್ಮಿಸುವ ಒಂಬತ್ತು ಅಕ್ಷರಪ್ರಣತೆಗಳು.

 "ಇಲ್ಲಿವೆ ಬೆಳಕಿನ ಕಿರಣಗಳ ಚಿಮ್ಮಿಸುವ ಒಂಬತ್ತು ಅಕ್ಷರಪ್ರಣತೆಗಳು. ಬದುಕಿನ ತಾತ್ವಿಕ ಸತ್ವಗಳ, ಮಾರ್ಮಿಕ ಸತ್ಯಗಳ ಪ್ರತಿಫಲಿಸುವ ಭಾವಪ್ರಣತೆಗಳು. ಇಲ್ಲಿ ಆಳಕ್ಕಿಳಿದಷ್ಟೂ ಜೀವ-ಜೀವನದ ಅರಿವಿನ ಸಾರವಿದೆ, ಬದುಕು-ಬೆಳಕಿನ ವಿಸ್ತಾರವಿದೆ. ಇದು ನಮ್ಮ ನಿಮ್ಮದೇ ಬಾಳಿನ ಅನುದಿನದ, ಅನುಕ್ಷಣದ ನಿತ್ಯ ಸತ್ಯಗಳೂ ಹೌದು. ಜಗದ ಯುಗ ಯುಗದ ಚಿರಂತನ ವಾಸ್ತವವೂ ಹೌದು. ಏನಂತೀರಾ.?" - ಪ್ರೀತಿಯಿಂದ ಎ.ಎನ್.ರಮೇಶ್. ಗುಬ್ಬಿ. 

1. ಕಾರುಣ್ಯ.!

ಕೊಲ್ಲುವವರ ಕುರಿತೇಕೆ ಭಯ ಭೀತಿ

ಹಿರಿದಿದೆ ಕಾಯುವವನ ಪ್ರೀತಿ ನೀತಿ

ಕೇಡೆಣಿಸುವವನ ಮಾತ್ಸರ್ಯಕಿಂತಲು

ಕಾಪಾಡುವವನ ಔದಾರ್ಯಕ್ಕಿದೆ ಶಕ್ತಿ.!

**************************

2. ಮರುಳ.!

ಬರುವಾಗ ಒಂಟಿ, ಹೋಗುವಾಗ ಒಂಟಿ

ಮತ್ತೇಕೆ ಸುಖಾಸುಮ್ಮನೆ ನರಳುತ್ತೀಯೋ

ಕಟ್ಟಿಕೊಂಡು ನಂಟು-ಗಂಟುಗಳ ಘಂಟಿ.!

***********************

3. ಪ್ರಜ್ಞೆ.!

ಬೆಳಕಿನ ಸಾಕ್ಷೀಪ್ರಜ್ಞೆಗಿಂತಲೂ

ನಿತ್ಯ ಬದುಕಿನ ಪಾಪಪ್ರಜ್ಞೆಗಳೇ

ಹೆಚ್ಚಾದಾಗ.... ಹುಚ್ಚಾದಾಗ....

ಅಡಿಗಡಿಗೂ ದುಃಖ ನೋವು.!

ಅನುಕ್ಷಣವು ಸೋಲು ಸಾವು.!

********************

4. ಅರಿವು.!

ಅರಿವೆ ಇರದಿರೆ ಜನರೆದುರು ನೀ ಬೆತ್ತಲು

ಅರಿವು ಇರದಿರೆ ನಿನ್ನೊಳಗೆ ನೀನೆ ಬೆತ್ತಲು

ಒಳ ಹೊರಗೂ ನಿನಗೆ ನಿತ್ಯ ಬರೀ ಕತ್ತಲು 

ಅಡಿಗಡಿಗು ಜಗದೆದುರು ನೀ ಬಟಾಬಯಲು.!

*********************

5. ಚೋದ್ಯ.!

ಗೆಳೆಯ ನೀನು ಅರಿವುದಿರಲಿ, ಅರ್ಥೈಸುವುದಿರಲಿ

ಕನಿಷ್ಟ ನೀ ಓದಲೂ ಆಗದು ನಿನ್ನದೇ ಹಣೆಬರಹ

ಮತ್ತೆ ಹೇಗೆ ಬರೆವೆಯೋ ಅನ್ಯರ ಬದುಕಿನ ಬರಹ.!

*********************

6. ಬದುಕು.!

ನಂಟಿರಬೇಕು ಅಂಟಿಕೊಳ್ಳದಂತೆ

ಗಂಟಿರಬೇಕು ಕಗ್ಗಂಟಾಗದಂತೆ

ಇರಬೇಕು ಇದ್ದೂ ಇರಲಾರದಂತೆ

ಅವ ಕರೆದಾಗೆದ್ದು ಹೋಗುವಂತೆ.!

********************

7.ಚಿರಸತ್ಯ.!

ಪಾಲಿನ ಪಂಚಾಮೃತ ಸ್ವೀಕರಣೆ ಬಾಳತತ್ವ

ಪ್ರತಿಕ್ಷಣ ಆಸ್ವಾಧನೆಯಲ್ಲಿಹುದು ನಿಜಸತ್ವ

ನಮ್ಮೆಲ್ಲ ನಗು ನಲಿವಿಗೆ ನಮ್ಮದೇ ನೇತೃತ್ವ

ನಮ್ಮ ಬದುಕಿಗೆ ನಮ್ಮದೇ ಉತ್ತರದಾಯಿತ್ವ.!

****************

8. ಪ್ರಾಪ್ತಿ.!

ದಕ್ಕಲು ಪ್ರತಿ ಅಣುರೇಣು ತೃಣ

ಜೀವಕ್ಕಿರಬೇಕು ಜನ್ಮಗಳ ಋಣ

ಸಿಕ್ಕಲು ಪ್ರತಿಭಾಗ್ಯದ ಕಣ ಕ್ಷಣ

ಬದುಕಿನಲಿ ಬರೆದಿರಬೇಕು ಕಾಣ.!

******************

9. ಜೀವನ.!

ತ್ಯಾಗ ಭೋಗಗಳ ನಡುವಿನ

ನಿತ್ಯ ಸಮತೋಲನವೇ ಜೀವನ

ಸೌಭಾಗ್ಯ ವೈರಾಗ್ಯ ನಡುವಿನ

ಆರೋಗ್ಯಕರ ಜೀವಯಾನ.!

ಎ.ಎನ್.ರಮೇಶ್.ಗುಬ್ಬಿ.