*ಹನಿಗವಿತೆಗಳು *

 "ಇಲ್ಲಿದ ನಗುವಿನ ಮೇಲಿನ ಐದು ಹನಿಗವಿತೆಗಳು. ನಗೆಯ  ಧರ್ಮ, ಮರ್ಮ, ಕರ್ಮ ಬಿಂಬಿಸುವ ಭಾವಪ್ರಣತೆಗಳು. ನಗು ಮುಖವ ಬೆಳಗುವ ಹಣತೆಯಷ್ಟೆ ಅಲ್ಲ. ಬದುಕಿನ ಹಾದಿಗೆ ಬೆಳಕಿನ ಒರತೆಯೂ ಹೌದು. ಏನಂತೀರಾ..?" - ಪ್ರೀತಿಯಿಂದ ಎ.ಎನ್.ರಮೇಶ್. ಗುಬ್ಬಿ.

1. ಅಸಾಧ್ಯ..!

ನೀ ಜಗವ ಯಾಮಾರಿಸಬಹುದು

ಮೊಗದಿ ಮೆಲು ನಗೆಯ ನಕ್ಕು..

ನನ್ನ ಕಂಗಳೆದುರು ಮುಚ್ಚಿಡಲಾಗದು

ನಿನ್ನೆದೆಯ ನೋವಿನ ಬಿಕ್ಕು..!

***************

2. ತೆರೆ..!

ನಿಮ್ಮೆದೆಯ  ತಲ್ಲಣಗಳಿಗೆ

ಹೊದಿಸಿಬಿಡಿ ಮೊಗದ

ಮುಗುಳ್ನಗೆಯ ಹೊದಿಕೆ.!

ತೊಡಿಸಬೇಕೇಕೆ ಪರರಿಗೆ

ನಮ್ಮೊಳಗಣ ನೋವಿನ

ಬೇಗುದಿ ಬವಣೆಗಳ ಕುಣಿಕೆ.!

***************

3. ಮರ್ಮ..!

ನಗುನಗುತ್ತಿದ್ದೇನೆಂದರೆ..

ನೋವುಗಳಿಲ್ಲವೆಂದಲ್ಲ.!

ಅಳುತ ನರಳುವುದಕಿಂತ

ನಕ್ಕು ಅರಳುವುದೆ ಲೇಸೆಂದು.!

ಬದುಕಲೇಬೇಕೆಂದ ಮೇಲೆ

ಬರುವುದೆಲ್ಲವನು ನಗುತ

ಎದುರಿಸುವುದೆ ಸಲೀಸೆಂದು.!

****************

4.  ಸಂಜೀವಿನಿ.!

ಎಷ್ಟಿದ್ದರೇನು ಒಳಗೆ

ನಿರಾಸೆ ನರಳಿಕೆ ಬಿಗು..

ಮೊಗದಲಿರಲಿ ನಗು.!

ಮುಗುಳ್ನಗೆಯ ಕಿರಣ

ಮಾಡೀತು ಲೋಕದ

ನೋವುಗಳ ಹರಣ..

ಸುಗಮ ಗೊಳಿಸೀತು

ಬದುಕಿನ ಚಾರಣ.!

***************

5. ನಗೆಯ ಬಗೆ.!

ಸುತ್ತಣ ಹಗೆಯಿರಲಿ

ಕಾಡುವ ಧಗೆಯಿರಲಿ

ಬಾಡದಿರಲಿ ಮುಗುಳ್ನಗೆ.!

ಸೋಲಿಗೂ ಸಾವಿಗೂ 

ಭೂಷಣದಂತಿರಬೇಕು

ಮೊಗದ ಮೇಲಿನ ನಗೆ.!

ಬಂದಾಗುವಂತಿರಬೇಕು

ಇರಿವವರ ನಂಜುನಾಲಿಗೆ.!

ಎ.ಎನ್.ರಮೇಶ್. ಗುಬ್ಬಿ.